Impakammo ni Commission on Elections Chairperson Atty. George Garcia nga awan ti mapasamak a transfer of polling place iti Dangdangla Elementary School voting center kalpasan a napuoran daytoy idi kalman.
Iti naangay a Kapihan, kinuna ni Atty. Garcia a mangipatungpal dagitoy iti makeshift voting areas kas kanayunan iti dua a klassroom a mabalin a maaramat kas polling centers iti nasao a pagadalan.
Gapu iti dayta, awan ti nasken a pagdanagan dagiti residente sadiay gapu ta dagiti botante nga agbotos iti Dangdangla Elementary School ket sadiayda ladta nga agbotos iti laksid ti napasamak.
Iti nasao nga insidente, dumanon iti 70% iti nasao a polling place ket naapekataran gapu iti uram.
Iti agdama, maim-imbestigaran ti rason ti uram bayat a maad-adal no kasapulan a maideklara ti Abra kas Commission on Elections under control.
Nupay kasta, nabukel metten ti special task force a mangbantay iti nasao a probinsya.
