Indeklara ti Commission on Elections (Comelec) a ni Benjamin Magalong ti nangabak ken agserbi iti maikatlo ken maudi a termino kas mayor iti siudad ti Baguio, bayat a ni Mauricio Domogan, a nagserbi a Congressman ti Baguio, nasurok a sangapulo a tawenen ti napalabas, ti nakagun-od iti puesto kas pannakabagi ti siudad iti House of Representatives.
Nairekord ni Magalong ti kaaduan a botos manipod kadagiti innem a kandidato a naka-ayayamna para iti posision ti mayor, a pakairamanan ti agdama a congressman a ni Mark Go a maikadua iti puesto.
Dakkel ti panagyaman ni Magalong gapu iti talek nga impaay dagiti nagbotos para kenkuana ken impasiguradona nga agbalin a “consistent” daytoy iti panagserbi.
Ti met running mate daytoy a ni Faustino Olowan ket naideklara a nangabak kontra iti kalabanna a ni Mylen Yaranon, a nangipila ti electoral protest.
Sigun kenni Olowan, maragsakan isuna iti resulta.
Kabayatanna, na-secure met ni Domogan ti panagsublina kas kongresista iti siudad kontra kadagiti innem a kandidato a nakalabanna.
Pinagyamanan met ni Domogan dagiti amin a nangsupurto kenkuana kagiddan ti panangkiddawna kadagiti kalabanna a pakawanen ken lipatan ti tension nga intunda ti campaign season.
Maysa kadagiti dinakamat ni Domogan a prayoridadna kas kongresista ket ti pannaka-amyendar ti Baguio City Charter, a vinetoe ni President Ferdinand “Bongbong” Marcos Jr. itay laeng nabiit.
Iti sabali a bangir, dagiti met nangabak kas konsehal iti siudad ti Baguio ket dagiti sumaganad:
1. Edison, Bilog- 58218
2. Joel, Alangsab – 57174
3. Jose Molintas – 56196
4. Leandro Yangot Jr.- 55972
5. Vladimir Cayabas- 53461
6. Peter Fianza – 51602
7. Van Dicang- 49434
8. Fred Bagbagen- 48642
9. Atty Paolo Salvosa- 48544
10. Betty Lourdes “Lulu” Tabanda- 47807
11. Yuri Weigan- 47054
12. Elmer Datuin- 46036
