BAGUIO CITY- Pimmusayen itay kanikadwa, May 13 ti 22-year old nga estudyante a biktima ken drayber iti Black Honda Click 125 motorcyle iti napasamak a vehicular traffic accident sadiay Crystal Cave, Bakakeng, Central, Baguio City idi May 10, 2025.
Sigun iti maysa a kapamilya daytoy, ni Julius Nathaniel “Julyo” Castillo Padilla ket malamayan sadiay Purok 8, Brgy. MS Garcia Cabanatuan City, Nueva Ecija ken maipunpon inton May 16, 2025.
Ni Padilla ket maysa a graduating student iti kurso a Bachelor of Science in Accountancy sadiay SLU, Baguio City.
Maipalagip nga idi dominggo, May 11 ket naipasidong iti operasyon ti nasao nga estudyante ngem saan a kinaya ti bagi daytoy gapu iti nasagrapna a dunor.
Nakuna pay ti kapamilya daytoy a nangipeksa met ti partylist nga involved iti nasao nga aksidente iti panggepda a tumulong iti pamilya ni Padilla ngem sigun kadakuada ket saan a daytoy ti kayat ti pamilya dagitoy.
Kabayatanna, iti panakiuman ti Bombo Radyo Baguio kenni PMAJ Marcy Grace Marron, ti PIO ti BCPO, mapilaan iti kaso a Reckless Imprudence Resulting in Homicide and Damage to Property ti drayber ti white Mitsubishi Tourist Bus.
Ti nasao a suspek ket agtawen iti 45, ken residente sadiay Caba, La Union.
Maipalagip metlaeng nga idi May 10 iti aldaw ti Sabado ket binangga ti mini-bus (Mitsubishi Tourist Bus) ti driver ti motorsiklo kasta met ti BENECO line post a nangitunda iti pannakadunor dagiti 12 a pasahero ti mini bus karaman ni Padilla.
Maibasar iti inisyal nga impormasyon ket nakapasar iti mechanical defect wenno loose break ti nasao a mini bus.//Bombo Genzel Depayso
