Naituding a maangay ti maikasangapulo a fishing tournament iti Burnham Lake, Baguio City inton June 28, 2025.
Mangrugi daytoy iti 7:30 iti agsapa iti nasao nga aldaw.
Iti pannakiuman ti Bombo Radyo kenni Rafael Serrano, Organizer Fishing Tournament Burnham Lake, kinunana a biglaan ti nasao a torneo gaputa awan ti panggepda nga agpaay-ayam inton umay a bulan agsipud ta adu dagiti pakakumikoman dagitoy.
Nupay kasta, inallukoy daytoy ni Mayor Benjamin Magalong tapno ipatungpal ti nasao a torneo agsipud ta mairugin a matarimaan ti burnham lake ita a tawen.
Gapu iti dayta, kinuna ni Serrano a possible a daytoy ti maudi a fishing tournament ita a tawen agingga a maileppas ti pannakatarimaan ti nasao a lake.
Dagiti interesado a makipaset iti daytoy,ket mabalin yo laeng a kontaken ti nasao nga organizer tapno agparehistro no sadino agbayad iti P500 para iti registration fee.
Inlawlawag ni Serrano a ti P500 ket maaramat para iti panaggatang kadagiti libre a tshirt a maipaay kadagiti makipaset kasta metten dagiti premyo a maipaay kadagiti mangabak.
Kagiddan dayta, al-allukuyenna ti publiko a makipaset iti nasao a torneo nangruna dagiti interesado iti daytoy.
