Dumanon iti agingga lima a tonelada a carrots ti naibelleng iti probinsia ti Benguet kalpasan a saan a mailako dagiti mannalon uray iti nababa unay a presio.
Sigun kadagiti mannalon, saanda a nabalinan nga ilako dagiti carrots uray iti P3 a presio tunggal kilo iti Benguet Agri-Pinoy Trading Center.
Iti Barangay Dominican Hill ken Mirador Hill, Baguio City, nagdudupudop dagiti umili iti nasurok a sangapulo a sako ti carrots a libre a naidonar.
Iti sabali a bangir, saan pay laeng a nangipaay ti komento ti Department of Agriculture bayat ti panangisayangkatda iti imbestigasion iti nasao a banag.
Kabayatanna, kinuna ti Samahang Industriya ng Agrikultura (SINAG) a napaliiwda a bimmaba ti presio ti carrots iti probinsia ti Benguet iti P3 aginga P10 tunggal kilo a nakadepende iti size ken kalidad ti produkto.
Sigun kenni SINAG President Rosendo So, adu ti suplay iti agdama isut rason a bimmaba ti presio.
