Impablaak ni Department of Education (DepEd) Secretary Sonny Angara a ti classroom backlog iti intero a pagilian ket dumanon paylaeng iti 165,000—maysa a parikut a manamnama nga adda manen epektona inton mangrugi a sumrek dagiti estudiante ita a tawen.
Tallo a lawas sakbay a malukatan ti School Year 2025-2026 inton Hunio 16, inaklon ni Angara a mabalin a kasapulan manen nga iyemplementar ti dadduma a parapubliko a pagadalan ti panagbalbaliw ti klase—dagiti dadduma ket doble, dadduma ket triple—gapu iti kinakurang ti classrooms.
Dinakamat ni Angara a kaaduan kadagiti kurang ti pagadalanna ket ti Region 4-A ken National Capital Region.
Ti School Year 2025-2026 ket naituding nga aglukat inton June 16, 2025 ken agleppas inton March 31, 2026.
Maipalagip nga iti sidong ti 2025 General Appropriations Act (GAA), P28 billion ti nailatang a pondo para iti Department of Education para kadagiti basic education facilities, agraman ti P7.18 billion para iti pannakaibangon ti baro a kindergarten, elementary, ken secondary school buildings.
Malaksid iti dayta,karaman metlaeng ti P6.13 billion a pondo para iti rehabilitation, renovation, repair, and improvement dagiti school buildings iti sidong ti “Repair All Policy.”
