BAGUIO CITY – Pimmusay ti sigud a mayor ti Lagayan kalpasan a pinalpaltugan dagiti saan pay a nabigbig a suspek idiay Dangdangla, Bangued, Abra itay agsapa.
Ti biktima ket ni Jendricks Seares Luna, 54-anyos, addaan asawa ken residente iti nasao metlaeng a lugar.
Ni Luna ket anak ni sigud a congresswoman Cecilia Luna nu sadino timmaray daytoy iti Sangguniang Panlalawigan idi napan nga eleksyon ngem saan a nangabak.
Maibasar iti report, 8:30 am ket nakaawat ti Bangued Municipal Police Station iti report maipapan iti insidente ti pammaltog a nagresulta iti panagresponde dagitoy.
Naammoan a nakatugaw ti biktima iti kiosk iti sango mismo ti pagnanaedanda idi simmangpet dagiti uppat a saan pay a nabigbig a suspek a nakalugan iti dua a motorsiklo.
Ditoy a pinalpaltoganda ti biktima ken dagusda a naglibas.
Gapu iti daytoy, nagsagrap ti biktima iti tama ti paltog iti nagduduma a paset ti bagina.
Naitaray met daytoy iti ospital ngem naideklara a dead-on-arrival.
Manarimaan ita ti drag net operation dagiti otoridad para iti dagus a pannakabigbig ken pannakatiliw dagiti suspek.
