Inlawlawag ni Engr. Elmer Jr. N. Mendoza, Transportation Development Officer 2 iti Department of Transportation Cordillera, a ti kinaawan dagiti daan a units ti lugan a kadawyan a maar-aramat para iti panagpasada ti taxi ti rason ti pannaggatang dagiti taxi drivers ken operators iti baro a unit ti lugan dagitoy.
Impeksa daytoy a kalpasan ti sangapulo ket tallo a tawen ti panagpasada dagiti taxi ket kasapulan dagitoy a masukatan.
Nupay kasta, ti parikut iti agdama ket awanen dagiti daan a units kas iti Isuzu adventure ken innova.
Gapu iti dayta, ti nagpilian dagiti operators ken drivers ket dagiti Fortuner, Montero, ken Mitsubishi expander.
Kinuna pay ni Engineer a ti maysa a konsiderasyon a pinanunot dagiti operators iti panaggatang kadagiti units ti lugan ket ti availability wenno kinaadda dagiti spare parts ti lugan.
Mainaig iti dayta, inlawlawagna met a saan a mabalin dagiti pick-up trucks a maaramat kas taxi gaputa ti laeng maaramat ket dagiti wagon type wenno multipurpose a klase ti lugan.
Innayonna pay a dagiti multipurpose a lugan ket 7 seaters ngem ipaikatda dagiti pagtugawan ti likod ti lugan tapno maakomodar dagiti bagahe isu’t gapuna a maximum ti lima laeng nga indibidual ti mabalin nga aglugan iti taxi a pakairamanan ti driver.
