Idagdagadag dagiti kabagian dagiti mapukpukaw a “sabungero” wenno “cockfighting enthusiasts” iti gobierno a rugiandan iti diving operations idiay Taal Lake- lugar a mapapati a nangibellenganda kadagiti bangkay, sigun iti maysa a saksi.
Sigun kenni Aurelio Panaligan, uliteg dagiti dua nga ubbing a mapukpukaw a “sabungero,” rugian koma dagiti technical divers ti aglangoy tapno maala dagiti bangkay dagiti biktima nu pudno a naitabon dagitoy iti Taal Lake, kas kinuna ti saksi.
Karaman kadagiti biktima ket dagiti agkasinsin a da Myson Ramos, 14-anyos, ken John Paul Ramos, 17-anyos, kaanakan ni Aurelio.
Napukaw dagitoy iti maysa a cockfighting arena idiay Sta. Cruz, Laguna idi Disiembre 2021.
Immapela pay ni Aurelio iti Department of Justice tapno salakniban ti Taal Lake, lugar a mapapati a nangibellenganda kadagiti biktima.
Kidkiddawenna pay iti nakasaksi nga ibutaktakna amin nga ammona nu siasino ti adda iti likudan ti pannakapukaw dagiti mammallot.
Malaksid iti dayta, immapela metlaeng ni Aurelio iti female celebrity a mapapati a karaman iti pannakapukaw dagiti biktima a makitinnulong kadagiti otoridad, kasta metten kenni Police Gen. Nicolas Torre III nga agtigna iti nasao a kaso.
