Ipampannakkel ti lokal a gobierno ti naawatda a Bloomberg Philanthropies Awards idiay Dublin, Ireland itay kallabes.
Iti pannakiuman ti Bombo Radyo kenni Mayor Benjamin Magalong, ti siudad ti Baguio ti kaunaan a nakaawat ti nasao a pammadayaw iti sangalubungan kaduada ti lima pay a sabali a pagilian.
Imbinglay ti mayor a nakaawat pay ti siudad ti cash award a $100,00 ngem saan paylaeng a naipaima daytoy kadakuada.
Ti Bloomberg Philanthropies Awards for Global Tobacco Control ket bigbigenna dagiti napateg a panagregget ti maysa a gobierno ken Non-Government Organization iti panangipatungpal kadagiti programa ken proyekto a maitunos iti World Health Organization.
Sigun kenni Magalong, daytoy ti maysa kadagiti kayatna nga ituloy–ti panangkessay ti panagaramat ti tabako ken panangsalaknib ti salun-at ti maysa a tao, kas nabutosan manen a mayor iti siudad agingga nga agleppas daytoy.
Maysa kadagiti nakita ni Magalong a nakatulong tapno maragpat ti nasao a pammadayaw ket ti nainget a pannakaipatungpal ti Smoke-Free Ordinance ti siudad.
Kabayatanna, kinuna ni Magalong nga agtultuloy a parikut ti siudad dagiti online sellers iti vape.
Nupay kasta, inkari ni Magalong a mangipaay latta dagitoy ti business permit kadagiti mangilako ti sigarilio, ngem mangipaay laeng iti kanito nga agtulnogda iti pagannurutan nga Smoke Free Ordinance.//Bombo Noveh Organo
