Addan ti lead iti Department of Justice nu pakasarakan kadagiti mapukpukaw a sabungero a mapapati a naibelleng idiay Taal Lake.
Sigun kenni Justice Secretary Jesus Crispin Remulla, addan ti impormasyon nga iggemda para iti panggepda a panangipatungpal iti diving operation.
Nupay kasta, inaklon ni Remulla a saan a nalaka ti ipatungpalda nga operasyon gaputa dumanon iti 200 kilometro quadrado ti kalawa iti Taal Lake.
Iti agdama, kinuna ti opisyal a saan pay a maipatungpal ti diving operation gapu iti saan a nasayaat a sasaaden iti panawen.
Kabayatanna, immuna metten nga impanamnama ni Remulla a protektado iti Philippine National Police ni Alyas Totoy a nangibukataktak kadagiti impormasyon seknan iti kaso dagiti missing sabungeros nu sadino, karaman kadagiti ak-akusaranna a mastermind ket ti business tycoon a ni Atong Ang.
Mainaig iti dayta, impeksa ti kapamilya ti maysa kadagiti missing sabungero a naaddaanda iti namnama a magun-od ti hustisya nga ipukpukkawda iti las-ud iti uppat itan a tawen idi nagtaud ti testigo.
Inaklon daytoy a napukawanda idin iti namnama gapu ta kellaat a simmardeng ti maipapan iti kaso dagiti mapukpukaw a kapamilyada.
Gapu iti panagtaud ita iti testigo a mangibutbutaktak kadagiti impormasyon nu anya iti napasamak, dakkel ti namnamada a magun-od da ti hustisya iti kabiitan a panawen.
