--Ads--

Dumanon iti P47,000 ti balor ti selpon ken laptop a natakaw manipud iti maysa a biktima sadiay Pico, La Trinidad, Benguet.

Maibasar iti report ti pulisya, immikkat ti kabsat ti biktima sadiay pagkaskaserraan dagitoy ngem saanna nga inserra wenno “in lock” ti ridaw.

Kabayatanna, matmaturog met ti biktima, ken idi immangon daytoy, nadiskubrena a mapukpukaw ti selponna nga smartphone nga aggatad ti P16,000 ken ti laptop nga aggatad ti P31,000.

Babaen iti maysa a CCTV footage iti kaabay dagitoy a building, nakita a simrek ti maysa a lalaki sadiay pagkaskaserraanda kalpasan nga immikkat ti kabsat ti biktima.

Maibasar iti inisyal a pannakipatang dagiti kameng ti LTMPS ken panangipatungpalda iti imbestigasyon, saanda paylaeng a nabigbig ti suspek.

Nupay kasta, naidispatch dagiti investigators para iti follow-up investigation ti nasao a kaso.