Naireklamo iti istasyon ti pulisya ti tallo a babai gapu iti maatap a kaso dagitoy nga estafa.
Dagiti naireklamo ket agnanaed idiay Lubas, La Trinidad, Benguet, Purok 4, Outlook, Baguio City, ken ti maysa ket idiay Quezon Hill, Baguio City, bayat a ti nagreklamo ket maysa a lalaki, agtawen ti 38, naasawaan, ken residente ti Aspiras, Palispis Highway, Baguio City.
Maibasar iti imbestigasyon ti pulisya, kinumbinsir ti maysa a suspek ti complainant nga isalda ti real estate property daytoy ken nagkari daytoy a bayadanna iti tunggal bulan.
Nagtalek met ti biktima iti suspek agsipudta impaayna ti certificate of title ti property daytoy kas collateral ken pinabuludanna daytoy iti P500,000.
Nupay kasta, natakuatan ti biktima a palso ti kinasiasino ti suspek ken nagpammarang daytoy kas inana.
Idi kinompronta ti biktima ti suspek, insungbat ti biktima a ti dua a kaduana ti nangpeke ti identification card tapno adda ti bingayda iti maala a kuarta manipod iti biktima.
Iti baet ti “written agreement” a naipatungpal iti nagbaetan ti suspek ken ti biktima, saan a tinungpal ti suspek ti obligasionna nga agbayad iti binnulan iti binulodna a kaurta manipod iti biktima.
Gapu iti dayta, nangipatulod ti biktima iti demand letters iti suspek.
Kalpasan ti sumagmamano a bulan, nangipaulog ti suspek iti uppat a cheque ngem awan ti nagbannaganna agsipudta closed account ti impaay ti suspek.
Gapu iti dayta, naipila ti reklamo kontra iti babai a suspek a residente sadiay La Trinidad gapu iti panaglabsingna iti Batas Pambansa Bilang. 22 wenno Bouncing Check Law.
