Imbilin ti Department of Health (DOH) ti 60-day price freeze kadagiti agarup 148 nga essential medicines kasaruno iti deklarasion ti state of calamity iti nagduduma a paset ti pagilian.
Sigun kenni DOH Assistant Secretary Albert Domingo, agarup 148 nga agas ti karaman iti price freeze, partikular kadagiti lugar a naakaro a naapektaran iti Severe Tropical Storm Crising, Tropical Storms Dante ken Emong.
Dagiti agas a karaman iti price freeze ket pakairamanan ti anesthetics, analgesics, antiasthma, anticoagulants, antidiabetics, antidiarrheals, antidotes, antiemetics, antihistamines, antihypertensives, antimicrobials, antipsychotics, antiseptics, cardiac drugs, corticosteroids, diuretics, insulin preparations, antifungals, vitamins and minerals ken dadduma pay.
Agipektibo ti price freeze iti 60 nga aldaw, agingga a maibilin ti pannakaikkat ti price freeze.
Inyunay-unay ni Domingo nga awan ti panagngato iti Suggested Retail Price (SRP) dagiti nasao nga agas.
Maibilbilin iti publiko nga ireport iti Food and Drug Administration wenno iti Department of Trade and Industry dagiti saan nga agtumpal iti daytoy.
