Impasigurado ni Baguio City Mayor Benjamin Magalong a nakasagana daytoy nga agbalin a testigo kadagiti mammanday-linteg a mapapati nga agnumnumar ken umaw-awat iti kickback kadagiti proyekto ti gobierno.
Sigun kenni Mayor Magalong, ur-urayenna laeng ti imbitasion manipud iti posible nga inquiry ti kongreso a mangidatag kadagiti dokumento a mangsuporta iti ibagbagana.
Impasingkedna a nakasaganan a mangidatag kadagiti naurnongna a pidaso ti ebidensia, ken nakasagana met a mangidedikar iti panawenna a tumulong iti imbestigasion.
Inyarig ti sigud a heneral ti expertise-na iti uneg ti mano a dekada a panagtalinaedna iti Philippine National Police (PNP).
Sigun kenkuana, adu a tawen daytoy a nangisaysayangkat idi ti imbestigasion manipod iti panagbalinna a baro a pulis agingga a nagbalin a henera ti pulisya.
Kinunana a ti framework nga inaramatna idi ket epektibo ken maar-aramatna metlaeng iti agdama kas local chief executive.
Patien ti sigud a heneral a nupay narigat a paneknekan ti pannakairaman dagiti politiko, kongresista, ken dadduma pay nga opisial iti praktis ken sistema ti kickback kadagiti public infrastructure project, adda latta ti wagas a matiliw dagitoy ken sungbatanda dagitoy.
Naipadamag a nakasagana a mangidatag daytoy iti posible a panagdengngeg nga idauluan ti Kongreso.
Immuna a nagserbi ni Magalong iti Philippine Constabulary ken iti PNP.
Iti sidong ti Philippine National Police, nagserbi daytoy kas chief ti Criminal Investigation and Detection Group (CIDG), ti opisina a mangisaysayangkat ti imbestigasion iti kontrobersial nga Oplan Exodus, ti operasion a nakatayan ti 44 a kameng ti PNP Special Action Force.
Nagretiro daytoy nga addaan ti ranggo a Police Deputy Director General.
