Naituding a maipasdek iti siudad ti Baguio ti Senior Citizens Community Center wenno kapada iti Home Care a pagtipunan ti serbisio para kadagiti senior citizen.
Iti pannakaiuman ti Bombo Radyo kenni Atty. Luz Laureta-Balisong, Regional Director ti National Commission of Senior Citizen-Cordillera, kinunana a karaman kadagiti serbisio a maidiaya iti center ket ti paramedical, negosio ken dadduma pay para kadagiti senior citizen.
Sigun kenni Atty. Balisong, addan ti intudo ni Baguio City Mayor Benjamin Magalong a daga a pakaipasdekan ti center ngem manarimaan paylaeng a maberberepikar nu feasible a pangipatakderan babaen iti DENR.
Iti kanito a saan a nasayaat ti lugar, posible nga aramatenda ti Office of the Senior Citizens Affairs a masarakan idiay Barangay Salud Mitra kas Senior Citizens Community Center gaputa addaan daytoyen ti exercise equipment.
Kabayatanna, naiyuswaten ti digital National Senior Citizen ID babaen ti eGovPH app itay laeng kallabes.
Gapu iti dayta, guyguyguyen ni Atty. Balisong dagiti senior citizen nangruna dagiti saan pay a nagparehistro.
Sigun kenkuana, mabalin nga agturong dagiti senior citizen iti opisina ti National Commission of Senior Citizens-Cordillera a masarakan idiay DBP Building, Lower Session, Baguio City tapno matulongan dagitoy nga agparehistro.
Kabayatanna, imbinglay ni Atty. Balisong a ti kangrunaan a parikut dagiti senior citizens a maiyumyuman iti opisinada ket ti pinansial a kasapulan, agas, depression ken ti panagmaymaysa (loneliness).
Gapu iti dayta, makikikoordinarda kadagiti agtutubo tapno makitinnulong dagitoy.
