Kinumpirmar ni Public Works Secretary Manuel Bonoan a nangipaiyulogen iti Department of Public Works and Highways iti show cause order kadagiti indibidwal nga adda pakainaiganna iti ghost flood control projects partikular idiay Baliwag City, Bulacan.
Sigun kenni Bonoan, dagiti show cause order ket naipaay partikular kadagiti nangiyendorso ken nangiyimplimintar kadagiti proyekto.
Innayonna a nu saan a satisfactory dagiti maawatda a pammalawag ket suspindirinda dagitoy ken ipilaanda iti kaskenan a kaso.
Immunan nga inaklon ni Bonoan nga adda dagiti maaw-awagan a ghost flood control projects kas nakumpirmar kabayatan iti naangay a panagdengngeg iti Senate Blue Ribbon Committee.
Sigun kenkuana, naduktalanna laeng ti maipapan kadagiti nasao a klase iti proyekto itay laeng nabiit nu sadino, kinunana nga iti agdama ket nainget nga iberberipikardan dagitoy.
Nagkari metlaeng daytoy nga imbestigaranda dagiti naanomalyaan a proyekto.
