Dumanon iti agarup P225,000 ti mapattapatta a danyos iti uram a napasamak iti 3 Story building ken apartment sadiay Puguis, La trinidad, Benguet.
Iti interview ti Bombo Radyo kenni SFO 3 Orly Bumacas, Chief Operations Unit ken Chief Intelligence Unit ti La Trinidad Bureau of Fire Protection, kinunana a posible nga agbaliw ti gatad ti danyos.
Inlawlawag ni Bumacas a makintingga a paset ti maikatallo a kaadsaran laeng ti nauram iti nasao nga apartment.
Sigun kenkuana, saan a naapektaran ti dua a kaabay daytoy nga apartment.
Innayonna a naglaun ti nauram nga apartment iti tagilako kas iti junk foods a kukua dagiti innem nga indibidual.
Nagus a nagresponde dagiti otoridad kalpasan a naitawag kadakuada babaen ti 911 Baguio ken residente.
Impetteng ti nasao nga opisyal nga awan ti nadangran iti napasamak nga uram.
Agtultuloy ti panakaipatungpal ti imbestgisyon tapnu mammuan nu anya ti rason iti napasamak nga uram.
Kabayatanna, ngimmato ti nailista nga insidente iti uram ti La trinidad ita a tawen no idilig idi 2024.
Maibasar iti datos ti nasao nga ahensia, 13 ti nailista dagitoy nga structural fire bayat a maysa ti grassfire.
Mainaig iti dayta, agpalpalagip ni SFO 3 Bumacas iti publiko a saan a liwayan dagiti malutluto a makan, kanayon a sukimaten digiti LPG tanks ken dadduma pay.//Bombo Noveh Organo
