Impatalged iti International Criminal Court (ICC) Pre-Trial Chamber 1 nga addaan daytoy iti jurisdiction nga idengngeg ti kaso ni sigud a president Rodrigo Duterte mainaig iti kaso daytoy a crime against humanity.
Nairuar ti nasao a desisyon idi kalman mainaig iti karit ni Duterte maipapan iti jurisdiction iti nasao korte a mangipasimudaag a maituloy ti panakadengngeg ti nasao a kaso idiay The Hague, Netherlands.
Maipalagip a naarestar ti sigud a presidente idi March 11, 2025 ken kasaruno dayta ket naibalud daytoy iti detention facility iti nasao nga international tribunal.
Ti sangsangwenna a kaso ket mainaig iti nadara a kampanya daytoy kontra iligal a droga bayat ti administrasyonna.
Mainaig iti dayta, immunan a saan a pinatgan ti Pre-Trial Chamber 1 ti kiniddaw ti kampo ni FPRRD nga interim release gapu ta kasapulan a sumango daytoy kadagiti panagdengngeg.
Nakaapektar metlaeng iti desisyon iti Pre-Trial Chamber 1 a saan a patgan ti interim release ti agtultuloy a panangibaga ti pamilya ti sigud a presidente a ti panakaarestarna ket maysa a kidnapping.
Iti agdama, maur-uray paylaeng ti petsa para iti confirmation of charges ni Duterte kalpasan a naitantan daytoy manipod iti orihinal nga iskedyulna a September 23.
