Agtultuloy latta ti maisaysayngkat a search and retrieval operations para iti dua a nabatbati a biktima iti napasamak a vehicular traffic accident (VTA) a napasamak idiay Gawa, Barangay Tocucan, Bontoc, Mountain Province iti agsapa idi Oktubre 27, 2025.
Ita ti maikadua nga aldaw a panagsapul kadagitoy.
Dagiti biktima a saan pay a nabirukan ket da Carlo Ancheta ken Edmund Romeo.
Rinugian dagiti nagresponde a sukimaten ti rangkis a nakatnagan dagitoy iti kauneg a 150 agingga 170 meters manipod iti kalsada agingga iti karayan–nu sadinno ti blue mini dump truck ket naglaon ti lima nga indibidual, ket natnag.
Mangisayangkat metlaeng ti grupo iti rappelling operations iti nasao a lugar.
Naideploy metten dagiti responders manipod iti nagduduma nga opisina, ahensia ken volunteers tapno masukimat ti Ground Zero agingga iti karayan ti Chico, ken agingga idiay Kalinga.
Kidkiddawenda met ti kararag para iti kinatalged ken salaknib dagiti makipaset iti operasion.
Maipalagip nga immunan a naipakaamo a pimmusay dagiti tallo nga indibudual a da Rogelio Romeo Dela Cruz. Jr, Jc Aquino Galicia, Zoren Jay Luas Alat.
