Impeksa iti maysa a representative dagiti mannalon manipod probinsya iti Abra ti panakadismaya daytoy iti mapaspasamak iti agdama a dakkel a makaak-apektar kadagiti mannalon.
Sigun iti daytoy, narigat ti kasasaad dagiti mannalon gapu ta iti baet a bassit ti maap-apitda ket nababa pay ti presyo iti irik.
Gapu iti dayta, adun dagiti mannalon ti maup-upay wenno makasarsardengen iti panagmula nangruna ket nangina ti production cost wenno mabusbusbosda.
Impudno ti nasao a representative nga iti baet nga adda ti maaw-awatda a tulong manipod iti gobierno, saan latta nga umdas daytoy rason a kidkiddawenda kadagiti maseknan nga opisyales iti gobierno nga isardengda ti panagkurakot.
Iti sabali a bangir, binabalaw met ti maysa a representative dagiti mannalon manipod Benguet ti inladawanna a bulok a sistema seknan iti panakailako dagiti nateng iti Pilipinas.
Sigun iti nasao nga indibidwal, kasapulan a mabaliwan daytoy gapu ta saan a naorganisa wenno naurnos.
Iti agdama ngamin ket dagiti prodyus dagiti mannalon ket maiturong iti trading post, sakbay a mapan iti buyer, ken kasaruno dayta ket ipasa manen ti buyer iti sabali.
Maysa kadagiti insingasing daytoy a pagbaliwan koma iti sistema ket ti kas idiay Japan nu sadino, dagiti nateng a manipod kadagiti mannalon ket diretso nga agturong iti gobierno ken kasaruno dayta ket ti gobierno metten ti makaammo a mangpaibos.
Malaksid iti dayta, tarigagay pay ti nasao nga indibidwal ti panakaadda iti fixed price nu bumaba dagiti nateng tapno saan a nakakaasi dagiti mannalon.//Bombo Noveh Organo
