EC, nangipaulog iti show-cause orders kontra kadagiti government contractors

Nangipaulog ti Commission on Elections (Comelec) iti show-cause orders (SCO) kontra kadagiti 27 a government contractors a nagidonar bayat ti panagkampanya dagiti sumagmamano a kandidato bayat ti 2022 elections.

Sigun kenni Comelec Chairperson George Erwin Garcia, naipaulog daytoy tapno ilawlawagda no apay a saan a rumbeng dagitoy a makassuan iti election offense iti pananglabsingda iti Section 95 iti Omnibus Election Code (OEC).

Kinunana a possible nga awaganda amin dagitoy inton umay a lawas.

Naipaayan metlaeng dagitoy iti sangapulo nga aldaw a mangipila iti sungbat seknan iti nasao a banag.