Nangipatungpal dagiti opisyal idiay Barangay Camp 7, Baguio City iti pre-emptive evacuation iti masakupanda a lugar kagiddan ti possible nga isasangbay ti bagyo nga Uwan.
Iti pannakiuman ti Bombo Radyo kenni Angelina Ramos, kapitan ti nasao a barangay, kinunana a binagaandan dagiti residente sadiay nangruna dagiti agnanaed sadiay Zigzag, pakairamanan dagiti agnanaed kadagiti narisgo a lugar.
Sigun kenkuana, agarup lima a pamilya ti binagaanda nga agbakwit iti evacuation center para iti seguridad dagitoy.
Kiddawna metlaeng kadagiti constituents-na a dalusan dagiti kanal no adda dagiti maipullat a rugit nangruna ket daytoy ti mangituntunda metlaeng iti panaglayos no napigsa ti tudo.
Malaksid iti dayta, nagpalagip metlaeng daytoy iti masakupanna a lugar nga agridamda iti aglawlaw, isagana dagiti kasapulan ken agbakwit no kasapulan tapno maliklikan ti aniaman nga insidente.
