Naireklamo ti agtawen iti 42 a lalaki, maysa a minero ken residente iti siudad ti Baguio, kalpasan a maatap a ginandatna a takawen ti baterya ti 12 wheeler truck nga imanmaneho ti agtawen ti 30 a lalaki, maysa a truck driver ken residente sadiay Pangasinan.
Napasamaak ti nasao nga insidente sadiay Taloy Sur, Tuba Benguet itay nabiit.
Maibasar iti imbestigasion ti Tuba Municipal Police Station (TMPS), nagparada ti biktma ken ti kaduana iti kalsada sadiay Taloy Sur tapno maturog.
Nupay kasta, nariknada ti panaggaraw ti truck kabayatan ti panaturogda.
Gapu iti dayta, pinadas a pinaandar iti driver ti lugan ngem saanen nga agandar.
Idiay metten a nakitana babaen iti side mirror nga ik-ikkaten ti suspek ti bateria ti 12 wheeler truck.
Dagus a tiniliw dagiti biktima ti suspek ken inturongda iti stasion ti kapulisan.
Napilaan iti kaso ti suspek ken narekomendaran iti P6,000 a piansa.//Bombo Nover Organo
