Inaklon ti legal team ni sigud a President Rodrigo Duterte nga awan ti impormasionda seknan iti maatap a warrant of arrest nga impaulog ti International Criminal Court (ICC) kontra kenni Sen. Ronald dela Rosa.
Sigun iti abogado ti Duterte a ni Nicholas Kaufman, maikontra ti aniaman a kanayonan nga arrest warrant agsipudta saan paylaeng a nasolbar ti apela ti kampo ni Duterte nga awan ti karbengan ti ICC iti daytoy.
Maipalagip nga imbutaktak ni sigud a Palace spokesperson Harry Roque a nairuaren ti warrant of arrest ni Dela Rosa.
Imbalakad pay ni Roque iti Senador a saan nga agpakawtibo ken ipilitna nga adda ti karbenganna a sumango nga umuna iti korte ti Pilipinas.
Immuna a kinuna ni Ombudsman Jesus Crispin Remulla nga adda kenkuana ti kopya ti arrest warrant kontra kenni dela Rosa.
Nupay kasta, saan paylaeng a maimplementar daytoy.
