Nagpakdaar ti Provincial Disaster Risk Reduction and Management Office (PDRRMO) iti Negros Occidental kadagiti umili sadiay kalpasan a nairekord idi kalman ti uppat nga ash emissions iti Bulkang Kanlaon, maysa kadagiti paggaammo nga aktibo a bulkan iti Pilipinas.
Naobserbaran ti Philippine Institute of Volcanology and Seismology (Phivolcs) ti aktibidad iti nasao a bulkan idi kalman kadagiti oras a 10:09 ken 11:31 iti agsapa, 12:47 iti pangngaldaw ken 4:58 iti malem.
Malaksid iti dayta, nairekord metlaeng ti lima a volcanic earthquakes iti daytoy ken panangiruarna iti 1,691 tons iti sulfur dioxide iti kapada nga aldaw.
Gapu iti dayta, adda ti pangta iti posible nga ashfall iti nasao a lugar rason a mabalbalakadan dagiti residente sadiay.
Iti agdama, naipasidong iti Alert Level 2 ti Bulkang Kanlaon a mangipasimudaag iti moderate level of unrest a mabalin a makaitunda iti phreatic eruptions ken precursory magmatic activity.
Imbalakad metten ti Phivolcs ti panakaipawil ti panagturong iti masakupan ti four-kilometer permanent danger zone.
