Sumango iti kaso a direct assault ken illegal discharge of a firearm ti maysa a lalaki a “mentally challenged” kalpasan nga inagawna ti paltog iti maysa a pulis iti siudad ti Baguio itay laeng kallabes.
Napasamak ti insidente iti T. Alonzo Street, Baguio City bayat ti Grand Float Parade.
Ti suspek ket agtawen iti 29 manipod idiay Santiago, Isabela ken naamuan nga agdama nga umin-inum iti agas para iti pagimbagan ti salun-at iti panunotna
Iti napasamak nga insidente, mapapati a puntiriana ti pulis a babai nga agtawen iti 39 a kameng iti Baguio City Police Office (BCPO).
Iti tengga ti panagkinnamat, inkasa iti lalaki ti paltog ken pinadasna a paputukan dagiti pulis a kumamkamat kenkuana.
Sigun iti Police Major Salvador Anas, hepe iti BCPO Station 7, nagpaputok ti suspek ngem iti semento a timmama ti bala. Gapu iti daytoy, timmalbog ti bala ken nangitunda iti bassit a pannakadangran iti tian daytoy.
Iti baet iti sugatna, intuloy ti lalaki a nagtaray paturong iti Lower Magsaysay. Nalapdan laeng ti panaglibasna idi nilapdan daytoy iti motorcycle rider, a nangitunda iti pannakatiliw daytoy dagiti pulis.
Dagos daytoy a naipaayan iti umuna a pannakataming iti Baguio City Disaster Risk Reduction and Management Office sakbay a naiturong iti maysa a lokal a pag-agasan para iti kanayunan a pannakaagasna.
Kinumpirmar metlaeng dagiti imbestigador a saan a residente iti siudad ti suspek ken agdama nga adda iti kostodia iti pulisia bayat a maisagsaganan ti pormal a panangipila kadagiti kaso a kriminal kontra kenkuana.
