Nawaswasen ti Cordillera Philippine National Police (PNP) Press corps.
Daytoy ket gapu iti nabatad a kinaawan interes ti Cordilllera PNP a makipartner kadagiti lokal a media no maipapan iti panagipakaammo kadagiti napapateg nga impormasyon iti publiko.
Nabayagen a nadlaw daytoy dagiti miyembro ti Media sipud pay nasukatan ti liderato ti Police Regional Office Cordillera.
Nadlaw ken nadismaya met ditoy ti Baguio Correspondents and broadcasters club wenno BCBC.
Kadagiti kallabes, adu dagiti nadadagsen ken makapainteres a paspasamak iti rehiyon Cordillera, ngem narigatan dagiti miyembro ti media nga agala iti impormasyon manipud iti pulisya.
Agparparang a narigat a madanon ti pulisya no adda dagiti negatibo a paspasamak, ngem nalaka met daytoy a maasitgan no maipapan kadagiti isyu a mangpabanglo iti imahe dagiti pulis.
Iti kinapudnona, pagimbagan ti pulisya no natibker ti relasyon daytoy kadagiti miyembro ti media para iti epektibo a law enforcement ken public service.
Babaen gamin iti daytoy ket maital-o ti “transparency” ken “public trust”, mapapartak ti panakaiwaragawag dagiti napapateg nga impormasyon, makatulong iti “crime prevention” ken “crime solution”, ken mapasayaat ti panakaisuro ti publiko seknan iti kinatalged ken panagtungpal kadagiti linteg.
Makaksid iti daytoy, malabanan ti “fake news” ken “misinformation”, mapasayaat ti “accountability” ken “professionalism”, ken mayasideg ti pulisya iti publiko.
Nupay kasta, adda iti pulisya no kayatna nga isubli ken pasayaaten pay ti relasyonna kadagiti miyembro ti media.//Written by Bombo Alfred
