BAGUIO CITY – Agkidkiddaw iti panakaawat ti publiko ti pamilya ti driver ti L300 van a nairaman iti aksidente a nakatayan ti maysa nga menor-de-edad a babae iti paset ti Marcos Highway sadiay Tuba, Benguet itay nabiit.
Maibasar iti public statement ti pamilya ti driver ti L300 van a nagun-odan ti Bombo Radyo Baguio, impetteng ti asawa ti driver a napasamak ti aksidente bayat a daldalyasaten ti asawana ken dua a pasaherona ti paset ti Marcos Highway.
Kinunana nga ag-overtake kuma ti asawana iti sarsarunuenna a bus kalpasan a nakitana a nawaya ti bangir a lane ti kalsada idi maysa a tao ti kellaat a naipuruak manipud sanguanan ti bus a nagdisso iti direksiyonda. Kinunana nga nakapagpreno met a dagus ti asawana ngem saannan a naliklikan ti trahedya.
Impetteng ti pamilya ti driver a daytoy a pasamak ket suportado ti dash cam recording ti luganda.
Linawlawaganna a saan a pulos a ninamnama ti asawana a mapasamak ti nasao nga insidente iti unos ti 22 a tawen nga panagmanehona.
Sigun kenkuana, saan nga intensyon wenno pinanggep ti asawana ti nasao a pasamak.
Innayonna a makmaklaat ken malaladingitanda unay iti nasao nga insidente, ken nangitunda pay daytoy iti panaka-trauma ti asawa ken ti dua a pasaherona.
Kagiddan iti daytoy, inyebkas ti pamilya ti driver ti panakipagriknada iti pamilya ti biktima.
Nupay kasta, masmasdaaw dagitoy no apay nga agparparang a dagitoy laeng ti mapabpabasul iti nasao nga insidente idinto ta nalawag met no kasano a napasamak ti insidente. Maladingitan pay dagitoy agsipud ta dagitoy ti pagkakatawaan dagiti tattao.
Gapu iti daytoy, namnamaenda saan a dagus a husgaran ida ti publiko, no di ket ipabiangda laengen kadagiti autoridad ti panakasukimat ken panakaduktal ti kinapudno iti nasao nga insidente.//Bombo Alfred Pudsoc
