Panggep ti Maharlika Investment Corporation (MIC) a mangipatakder iti nalawlawa nga oil storage facility iti pagilian babaen iti tulong ti gobyerno ken pribado a sektor tapno makatulong a maprotektaran ti pagilian manipud iti killaat a panagngato ti presyo ti petrolyo.
Sigun kenni Maharlika Investment Corporation (MIC) President ken CEO Rafael Consing, Jr., maipatumpal ti nasao a proyekto iti sidung ti consortium model no sadino ti Philippine National Oil Company (PNOC) ti mag-purchase ti daga ken dadduma pay nga assests bayat a ti Maharlika Investment Corporation met, kadua ti pribado a sektor ti mangbaklay iti gastos ken operasyon dagiti tank farm.
Innayon ni Consing a panggep daytoy a proyekto a paregtaen ti kapasidad ti pagilian iti panangipreserba ti petrolyo a saan a mangipaay iti parikot iti gobyerno ken iti aktwal nga imbentaryo ti petrolyo.
Mapatta patta a malpas ken agbalin nga operational ti nasao a proyekto iti las-od ti dua agingga tallo a tawen manipud iti pannakairugi daytoy.
Sigun kenni Consing, aklonenna a ti mannarimaan a sitwasyon ket nangitunda ti panagngato ti presyo ti imported fuel iti agarup 60-70% , a nagresulta met iti nangatngato a kapital a kasapulan a maiparuwar dagiti retailer tapno mapagtalinaed ti imbentaryo dagitoy. //bombokaren.c.s
