Nakasuanen ti pito a kadete manipod iti Philippine National Police Academy ken dua a pulis seknan iti insidente iti hazing, sigun iti Philippine National Police.
Karaman kadagiti akusado ti lima a third class ken dua a second class cadets, kasta metten ti maysa a commissioned ken maysa a non-commissioned police officer.
Napilaan dagitoy iti kaso iti panaglabsing iti Anti-Hazing Act of 2018 kalpasan a nadangran ti nasurok 20 fourth class cadets idi Abril 13.
Nagsagrap dagiti biktima iti “paso” ken nadangran kalpasan ti mapapati a panangi-uper iti naikiwar a drain cleaner ken muriatic acid.
Tallo kadagiti suspek ti natiliw ken uppat pay ti naduktalan.
Gapu iti insidente, naikkat iti puesto ti PNPA director ken walo a dadduma pay nga opisial.
Rumrummuar iti imbestigasion a nangrugi ti hazing iti internal iti isyu seknan iti cadet a kayatna nga aglusulos, nu sadinno mapapati a nadusa dagiti underclassmen.
