Opisialen a nabigbigen ti siudad ti Baguio kas maysa kadagiti founding cities iti Asian Circular Cities Declaration (ACCD), maysa a napateg nga addang iti panangpatibker iti kari a mapagtalinaed ti urban development ken regional cooperation.
Sigun kenni Donna Rillera Tabangin, dadaulo iti City Planning, Development and Sustainability Office (CPDSO), pormal a naisayangkat ti panangbigbig idi Marso 25, 2026 iti naisayangkat nga inaugural ceremony idiay Bangkok, Thailand. Kadua ti Baguio ti 23 a dadduma pay a siudad iti Asya iti panangiyuswat iti deklarasion.
Mapatta-patta a dumanon iti nasurok iti 56.7 milion nga indibidual ti pakabuklan a populasion kadagiti siudad a participants, a mangipakpakita iti lumawlawa a tignay iti panagaramat iti circular economy iti rehion.
Inlawlawag ni Tabangin nga agserserbi a plataporma ti ACCD para kadagiti siudad tapno tulungan iti panagkessay iti basura, ad-adda nga “efficient” a panagaramat iti kinabaknang, ken panangpasayaat kadagiti sistema a para iti aglawlaw. Numan pay saan nga obligado daytoy a suruten, kinunana a nalawag a mangisimsimbolo daytoy iti collective agreement dagiti lokal a gobierno.
Ti nasao nga inisiatiba ket inyendorso dagiti lider iti siudad, karaman dagiti mayor ken gobernador, kas giya iti napaut a kinatalged ti aglawlaw ken ekonomia.
Innayonna pay ni Tabangin nga iti uneg laeng iti lima a bulan sakbay ti seremonia, nasurok duapulo a siudad ti nagpirma iti deklarasion.
Kas maysa kadagiti umuna a nagpirma, idadauloan ti Baguio iti panangitandudo iti panggap daytoy iti rehion.
Nailadawan ti deklarasion kas maysa a “common aspirational goal” a panggepna a papigsaen ti koneksion dagiti siudad, mangibinglay iti pannakaamo ken inobasyon, ken magun-od ti kongkreto a proseso kadagiti estratehiya a kas iti panangpasayaat iti waste management ken impluwensia iti national policy.
Iti pannakipaset iti ACCD, pinatibker pay ti Baguio ti papel daytoy kas maysa a liders iti tay-ak iti sustainability iti Pilipinas, kagiddan ti panag-align dagiti lokal a programa iti nalawlawa a panggep iti environment iti rehion ken iti sangalubungan.
