Impetteng ni Senador Jinggoy Estrada a “baseless” wenno awanan basaran dagiti alegasyon seknan iti maatap a pakainaiganna iti naanomalyaan a flood control projects.
Sigun kenni Senator Estrada, nakompirmar iti panagsukimat ti Legislative Budget Research and Monitoring Office (LBRMO) ti Senado nga awan ti insingasingna wenno inendorsona a maamyendaran ken manayunan ti pondo ti Department Of Public Works And Highways (DPWH).
Innayonna pay a sipud nagrugi ti kontrobersiya ti flood control projects, inyulit-ulitna nga awan ti nakaibatayan ken awan ti ebidensia dagiti alegasion kontra kenkuana.
Iti baet baet dayta, nakasagana ti Senador a sangwen dagiti amin nga alegasion.
Kabayatanna, inyunay-unay ni Senate President Pro Tempore Panfilo Lacson, Chairman ti Blue Ribbon Committee a mangim-imbestigar iti flood control a saan nga inserrek ti Sen. Estrada ti pondo para iti sumagmamano a flood control projects iti sidong ti 2025 General Appropriations Act (GAA).
Innayon ni Lacson a paset daytoy ti kontrobersial a P142B insertions a maipagarup nga inaramid ni sigud a Senate President Francis Escudero, kabayatan ti November 2024 small group bicam visit daytoy iti House of Representatives.
