Impakaamo iti Department of Trade and Industry–Cordillera (DTI-CAR) nga adda dagiti programa a makatulong kadagiti photographer ken dadduma pay a creative workers tapno masalakniban dagiti aramidda, makaaramat ti kagawaan, ken mangpasayaat iti kabaelanda kas negosyo.
Iti naisayangkat a press conference iti siudad ti Baguio itay kallabes, kinuna ni DTI-CAR OIC Assistant Regional Director Atty. Samuel Gallardo a mabalin magunggonaan ti photography kadagiti programa ti DTI kas iti Shared Service Facilities (SSFs), business training, ken intellectual property awareness.
Kinuna ni Gallardo a ti Shared Service Facilities ket sumopsuporta iti micro, small, ken medium enterprises (MSMEs) ken dadduma pay a priority sectors, karaman ti creative industry.
Numan pay para iti animation ti maysa a baro a pasdek, mabalin metlaeng a maaramat iti panangipakita iti creative outputs usar ti computers, drawing tablets, ken software.
Innayonna pay a mabalin a maadal ti pannnakaibangon iti kapada a pasdek para iti photography nu adda dagiti interesado nga stakeholder a mangimanehar daytoy para iti creative industry nga awana iti bukodda a kagawaan.
Kinunana metlaeng a napateg ti pannakaamo iti intellectual property tapno masalakniban dagiti aramid dagiti photographers kontra iti saan nga otorisado a panagaramat, ken paset daytoy iti training nga ipatpatungpal iti DTI.
Panggep iti DTI Cordillera a suportaran dagiti photographer ken dadduma pay a creatives a sumrek iti ken masanay iti creative industry.
