Impakaammo ti Department of Energy (DOE) a manamnama ti panagrollback iti presyo ti diesel ken kerosene inton sumaruno a lawas bayat a posible met a ngumato ti presyo ti gasolina.
Maibasar iti uppat nga aldaw a trading monitoring iti Mean of Platts Singapore, mapatta-patta a bumaba iti P9.00 tunggal litro ti diesel ken P12.00 tunggal litro ti kerosene.
Kabayatanna, posible a ngumato ti P1.60 agingga P1.70 tunggal litro ti gasolina.
Sigun kenni Department of Energy Oil Industry Management Bureau Director Rino Abad, in-innot nga agsubsubli iti normal market-based pricing ti produkto a petrolyo kalpasan a naapektaran iti tensyon idiay Middle East.
Innayon daytoy nga iti agdama, dumanonen iti $70 agingga $95 tunggal bariles ti presyo ti lana iti world market. Nupay kasta, manamnama a bumaba daytoy iti normal a presyo daytoy a $55 agingga $65 tunggal bariles.
Opisyal nga iyanunsyo dagiti kumpanya ti petrolyo dagiti opisyal a presyo ti produkto a petrolyo inton Lunes a maipatungpal inton Martes. //bombokaren.c.s
