Agtaltalianed nga iti siudad ti Baguio ti kaadduan a bilang dagiti indibidual nga addaa iti Human Immunodeficiency Virus (PLHIV) iti rehiyon.
Sigun kenni Darwin Babon, Development Management Officer ti Department of Health-Cordillera National Aids ken STI Prevention and Control Program, umuna ti siudad ti Baguio iti listaan ti Top 10 Affected Municipalities/Cities nga addaan iti 800 a kaso, 56% daytoy iti pakabuklan a bilang ti PLHIV iti rehiyon Cordillera a nairekord idi Disyembre idi napalabas a tawen.
Maisaruno ditoy ti La Trinidad nga addaan iti 102 a kaso kabayatan a nakarekord met ti Bangued, Abra iti 74. Sumaruno ti Kalinga iti 52 kaso; ken Tuba, Benguet nga addaan iti 37 a kaso.
Inlawalawag ni Babon nga adda dagiti karit a masangsango seknan iti nasao a sakit nangnagruna iti panangngato stigma ken ti kaawan ti umdas a research a nakapokus iti HIV.
Nupay kasta, impakaammo ni Babon nga adda ti improvement iti health-seeking behavior iti siudad ti Baguio maibasar iti latest survey iti sidung ti Epidemiology Bureau ti nasao a departamento sadino ammon ti kaaduan nu kaanuda nga agpataming ken no sadino ti pakasarakan kadagiti klinika a mabalinda a pagpatamingan.
TREATMENT HUB
Adadda pay a makatulong iti panangpaksyat ti Human Immunodeficiency Virus (PLHIV) ti pannaiyuswat iti Nurturing Awareness, Mobilizing Networks, and Advocating to Mitigate the Impacts of AIDS (NAMNAMA) Clinic iti laeng likod ti Baguio Convention and Cultural Center.
Ti nasao a klinika ket makatulong iti panangipaay ti serbisyo para iti Human Immunodeficiency Virus (PLHIV) ken dadduma pay a pakaseknan iti salun-at.
Sigun kenni Dr. Celia Flor Brillantes, Baguio City Health Officer, mailukat ti nasao a klinika manipud ala-una ti malem agingga alas-dyes ti rabii tapno maipaay latta ti serbisyon uray nu nagsara dagiti dadduma a treatment hub. //kcs,mp4
