Inyebkas ni Genevieve Ocon ken Rowena Daus, agpada nga agab-abang idiay Purok 22, Irisan, Baguio City dagiti agdama a pakaseknanda iti nasao a lugar.
Sigun iti dua, nu adda laeng ti kwarta dagitoy, saanda a bumayag iti nasao a lugar.
Daytoy ket adda pakainaiganna iti layos a kanayon a mapaspasaranda nangnangruna nu napigsa iti tudo.
Sigun kenni Ocon ken Daus, sipud 2020 a nag-abangda iti nasao a lugar, kanayon dagitoyen a malaylayos.
Iti agdama, agtataeng dagitoy iti maikadua a kadsaaran ti pagab-abanganda. Innayonda nga awanen ti agab-abang iti first floor ti nasao a building gapu ta maluplupos daytoy ti layos nu aglayos.
Iti agdama, talloda a pamilya nga agab-abang iti nasao a building no sadino ₱3,500 ti abangda tunggal bulan.
Malaksid iti layos a parikutda, maysa pay a pakaseknanda ket ti kalsada da gapu ta karaman daytoy a malay-layos. Imbinglayda a pagnaan daytoy dagiti sumagmamano nga estudyante idiay.
Sigun pay kadakuada, kanayunda nga iyum-uman ti nasao a pakaseknan iti barangayda nangnangruna nu meeting ngem ti kanayun a sungbat a maaw-awatda, awan ti kasiguradoan ti solusyonna gapu ta private property daytoy.
Ti nasao a pasdek ket kasla catch basin a pakaurnongan amin ti danum no sadino sigun kadagiti dadduma a residente a nakasarita ti Bombo Newsteam idiay, nagurnongan itan ti danum ti nasao a lote nga asideg iti pasdek kasta metlaeng kadagiti basbasura a naiyan-anod.
Impeksa met da Ocon ken Daus nga adda ti kanal a mabalin a lumsotan ti danum ngem maatap a napulatan daytoy.
Imbinglayda pay a tunggal agtudo, isabay dagiti sumagmamano a residente nga agipaiyanod kadagiti basurada pakairamananen dagiti natnatay a tarakenda no sadino isuda nga adda iti akinbaba ti mangsagsagrap iti naangot nga ayamuum ken dagiti basura a naiyan-anod. Umap-apila ken agkidkiddawda met iti tulong dagitoy kadagiti maseknan nga ahensya. //Bombo Noveh Organo
