Madanagan iti Baguio City Council iti posible a pangta iti salun-at iti publiko gapu kadagiti ilegal a water delivery operation a saan a naipasidong iti regular a panagsukimat iti kalidad iti danum.
Iti naisayangkat a session itay nabiit, kinuna ni Owen Dagdagen iti Baguio District Water Delivery Association (BDWDA) a saan a saklaw iti water quality testing dagiti saan nga otorisado a water delivery operator.
Kinunana a dagiti lehitimo a supplier ket kasapulan nga adda ti permit sakbay a makasakdo iti danum, ngem adda dagiti iligal nga operator a mangal-ala iti danum kadagiti saan nga otorisado a pagal-alaanda.
Rimmuar metlaeng iti panagdengngeg nga iti nasurok 500 deep well iti Baguio, duapulo laeng ti addaan iti permit iti National Water Resources Board (NWRB).
Sigun kenni Engr. Fernando A. Peria iti Baguio Water District, 90% iti nasurok 200 deep well a nasukimat idi 2023 ket saan a a nagtulnog iti nairuar a pagalagadan.
Kas sungbat, ad-adalen iti City Council ti nainget a regulasyon kontra kadagiti illegal water delivery operator, karaman ti panangipatungpal iti Ordinance Number 41-2007 ken singasing a pannakailaksid iti number-coding dagiti nakarehistro ken sumursurot iti linteg a water delivery truck tapno maguyugoy ti dadduma pay nga operator nga aramiden a lehitimo ti operasionda ken maipaspasidng iti regular nga inspeksyon.
Sigun iti lokal a gobierno, agtultuloy ti koordinasion dagiti maseknan nga ahensia tapno maipasigurado ti nadalus ken natalged a danum a mailaklako iti siudad ti Baguio.
