Nakaawat iti pammabalaw iti online ti Professional Regulation Commission (PRC)–Baguio Regional Office kalpasan a nagwaras iti maysa nga open letter manipod iti maysa a baro a Licensed Professional Teacher (LPT) seknan iti mapapati a saan a nasayaat a panangiggem iti isyu iti guest tickets para iti oathtaking ceremony inton Domingo, Hulio 5, 2026.
Iti post ni Earl Sarmiento iti Facebook account daytoy idi Hunio 29, kinunana a gimmatang ti kabsatna iti dua a guest tickets tapno kuma makipaset daytoy ken ti inada iti napateg nga okasyon, ngem maysa laeng ti mapapati a naipaay a ticket bayat a maysa met ket nai-refund.
Nagbalin a sentro iti kontrobersia, kas maibasar iti post, ti mapapati a sungbat iti maysa nga empleyado iti Professional Regulation Commission–Baguio iti Viber group chat nu sadinno kinunana nga awan iti karbengan nga agreklamo ti maysa a participants gaputa naudi daytoy a nagparehistro nu idilig iti dadduma.
Ti nasao nga statement ket nakaawat iti reaksion manipod kadagiti netizen, nga immapela iti nasaysayaat a customer service ken propesional a panagsungbat manipod kadagiti kameng iti nasao nga ahensia.
Iti open letter daytoy, kidkiddawen ni Sarmiento iti PRC a repasuen ti sistema iti panangipaay iti guest tickets ken siguraduen a nasaysayaat, nalawag ken ti panangasikaso ket addaan iti panagraem kadagiti sumaruno a kiddaw, nangruna ta maminsan laeng a maipatungpal iti baro a lisensiado a propesional ti nasao nga okasyon.
Iti agdama, awan pay iti official statement ti PRC–Baguio seknan iti nasao nga isyu.
