Pormalen a naisubli iti Bureau of Internal Revenue (BIR) ti green box a naglaun iti tax records ni Vice President Sara Duterte ken ti asawana a ni Atty. Manases Carpio.
Immuna a naipaima ti selyado a box iti House of Representatives sakbay a naipasa iti Senado tapno agserbi kas ebidensiya ti House Prosecution Panel kontra kenni VP Sara.
Nupay kasta, imbilin ni Presiding Officer Francis “Chiz” Escudero a maisubli ti nasao a box iti BIR gaputa awan ti court order para iti legal a pannakaiyakar ti kustodia daytoy iti Senado.
Indauluan ni Senate Secretary ken concurrent clerk of court Renato N. Bantug Jr., babaen ti Office of the Sergeant-at-Arms (OSAA) ti pannakaisubli ti nadakamat a kahon iti BIR Office sadiay Quezon City ita nga aldaw, Hulio 7, 2026.
