Inyebkas ti Balatoc Kalinga Tribe Inc. (BKTI) a saan a pudno dagiti agwarwaras a pammabasol kontra iti Batong Buhay Mining Project sadiay Kalinga.
Sigun kenni Victor Gumisa, miembro ti BKTI, saan a naggapu iti opisial a liderato ti tribu, Council of Elders, ken kaaduan kadagiti umili ti Balatoc, Pasil, Kalinga dagiti agwarwaras a pammabasol.
Innayon ni Gumisa a manipud idi 2008, naawat ti BKTI ti National Commission on Indigenous Peoples (NCIP) kas opisial a mangibagi iti Balatoc Tribe, isu’t gapuna nga addaan iti karbengan a mangipasya iti panagaramat kadagiti mineral iti ancestral domain.
Suportado met ti Board of Directors ken kaaduan kadagiti panglakkayen ti tribu ti responsable a panagmina.
Sigun kenni Gumisa, pinili ti BKTI ti Metals Exploration kas partner iti proyekto a mangipaay iti tribu iti 20 porsiyento nga equity ken representasyon iti Board of Directors.
Naipresentar met ti draft ti Memorandum of Agreement (MOA) a naglaon iti pannakaibango ti dalan, health center, scholarship, trabaho, ken dadduma pay a proyekto para iti komunidad.
Nupay kasta, inilawlawag ni Gumisa a saan paylaeng a napirmaan ti MOA wenno JOA. Kinunana a saan nga agpirma agingga a saan a nakonsulta ti entero a tribu, dagiti abogado ken propesyonal.
Innayon ni Gumisa a dagiti kontra iti proyekto ket adda bukodda a pagimbagan, nangruna no maapektaran ti iligal a panagmina.
Sigun kenkuana, ti legal ken responsable a pagmimina ket mangipaay iti trabaho, imprastruktura, edukasyon, ken salun-at, bayat a maipangpangruna met ti Certificate of Ancestral Domain Title (CADT) ken Ancestral Domain Sustainable Development and Protection Plan (ADSDPP).
Kinunana pay a ti Batong Buhay Mining Project ket saan laeng a makatulong iti Balatoc Tribe no di ket iti panagdur-as met ti industriya ti critical minerals iti Pilipinas. //Bombo Jerwin Aquino
