Patien ni sigud a Bureau of Internal Revenue (BIR) Commissioner Kim Henares a simple a parikut ti green box a naglaun iti tax records da Vice President Sara Duterte ken ti asawana a ni Atty. Manases Carpio.
Sigun kenni Henares, pagbalinen ti prosekusyon a witness ti BIR Commissioner no panggepda nga aramaten ti tax records iti impeachment trial.
Inlawlawagna nga adda ti bileg ti BIR Commissioner no maipapan iti panagiggem ken pannakairuar ti tax records ti amin a Pilipino, karaman dagiti opisial ti gobierno.
Gapu iti daytoy, kasapulan ti motion wenno subpoena tapno mapaayaban ti comissioner no kasapulan ti impeachment court dagiti tax records.
Maipalagip a sigud a nagtestigo iti House prosecution panel ni Atty. Henares idi panawen ti impeachment trial ni sigud a Chief Justice Renato Corona.
Kabayatanna, impetteng ni Atty. Henares a saan a rumbeng a pagbalinen a komplikado ti isyu seknan iti kontrobersiyal a green box, kasta met ti pannakaibutaktak ti tax records ni VP Sara.
Inyunay-unayna a no kayat ti prosekusyon nga aramaten ti BIR records, surutenda ti proseso a kas iti napasamak idi iti Corona impeachment trial.
Maipalagip nga inpasubli ni Senator-judge Chiz Escudero ti nasao a box iti BIR Office sadiay Quezon City iti immuna nga aldaw ti impeachment trial kontra kenni VP Sara Duterte.
