Nainget a maipatpatungpal idiay Barangay San Roque, Baguio City ti waste segregation kas paset ti panangsolbar iti problema iti basura nangruna iti panawen ti panagtutudo.
Iti interview ti Bombo Radyo, impakaammo ni Brgy. Captain Ernesto Amon a kada Miyerkoles ti regular a panagkolektar iti basura ken adda met ti manginspeksion no umiso ti pannakaisina dagiti nabubulok ken saan a nabubulok a basura.
“Talaga nga inyunay-unay mi ti nabubulok ken di nabubulok isu a nakaseparate amin” sigun iti Kapitan.
Dinakamatna a kalpasan ti panagkolektar, dagiti street sweeper ti mangdalus iti naggappuan dagiti basura tapno mapagtalinaed a nadalus ti lugar.
Impalagip ti barangay ti panagtitinnulong dagiti umili iti umno waste segregation tapno maliklikan ti pannakaiwara dagiti basura.
Kabayatanna, nagpalagip met ti General Services Office kadagiti umili a saanda koma nga agiruar iti basurada no agtudtudo tapno saan a maiyanod ken maipullat kadagiti drainage.//BomboKhey
