Nangilatang ti city government iti P21M para iti rehabilitasyon ti “mini lagoon” idiay San Roque, Baguio City.
Iti interview ti Bombo Radyo kenni Barangay Captain Ernesto Amon, kinuna nga iti agdama ket bassit laeng ti drainage system iti barangayda rason a tunggal agtudo ket ngumato ti lebel ti danum a mangituntunda iti risgo kadagiti lima a balay ken basement ti barangay hall.
Innayon ti nasao a barangay official a nainspeksyon metten dagiti opisyales ti Department of Public Works and Highways ti barangayda ken naibinglayna amin a pakaseknanda.
Inlawlawag ni Barangay Captain Amon a ti maaramid a mini lagoon ket pagnaan metlaeng dagiti danum nga agtataud manipud Naguilian ken kadagiti nangangato a kaarubada a barangay.
Namnamaenna met a mapapartak ti proyekto tapno maliklikan dagiti negatibo nga epekto nu mapasaran ti napigsa a panagtudo kadagiti sumarsaruno nga aldaw.//BomboKhey
