Pormal a kiniddaw ti House Prosecution panel iti senate impeachment court a sapsapaen ti iskedyul ti panagtestigo ni National Bureau of Investigation (NBI) Director Melvin Matibag iti agtultuloy nga impeachment trial ni Vice President Sara Duterte.
Kiniddaw ni Prosecution Representative Lorenz Defensor nga iyakar ti panangtestigo ni Matibag inton bigat manipud iti orihinal nga iskedyulna inton Hulyo 15.
Immunan a nagsurat ni Matibag kenni lead prosecutor Representative Gerville Luistro nu mabalin a sapaen ti panagtestigona gapu ta naimbitaran daytoy iti Regional Summit on Scam Center Compounds and Transnational Organized Crime idiay Bangkok manipud Hulyo 21 agingga Hulyo 22.
Kiniddawna a makapagtestigo pay daytoy sakbay iti panangturongna idiay Bangkok tapno saan a madisturbo ti panagdengngeg ti senado.
Kinontra met daytoy ti depensa gapu iti patienda a panaglabsing iti direktiba ti impeachment court a 5-day witness rule ken karbengan dagitoy tapno i-cross examine da ti testigo.
Iti udi na, binilin ti korte ti prosekusyon nga isumitirda ti mismo a surat ni Matibag pakairamanan ti travel authority daytoy tapno adalenda pay nga umuna sakbay a maaprobaran ti kiddaw daytoy.
Manamnama a mangipaay ti detalye ni Matibag seknan iti nagbalin nga imbestigasyon ti National Bureau of Investigation (NBI) iti mapapati a panagpangta ni VP Sara kontra kada President Ferdinand Marcos Jr., First Lady Liza Marcos, ken sigud a House Speaker Martin Romualdez. //bombokaren.c.sapirao
