Kinarit ni House private prosecutor Lorna Kapunan ti defense panel a saandan a kontraen ti kidkiddawen ti prosecutor a subpoena para iti tax ken bank records ni Vice President Sara Duterte.
Sigun kenni Atty. Kapunan, maulit-ulit nga ibagbaga ti depensa nga awan ti ebidensiya nga iggem ti House panel, uray pay idi naaddaan iti panagdengngeg ti House Justice Committee.
Nupay kasta, kontraen met ti depensa idi nangiparang ti House panel iti ebidensiya.
Kabayatanna, dinakamat pay ti beterano nga abogado ti immun-una a kinuna ni VP Sara a sungbatanda dagiti alegasion iti impeachment court.
Ngem imbes nga aramidenda daytoy, napaliiw ni Atty. Kapunan a padpadasen ti defense team a lapdan ti tignay ti prosecution a mangidatag iti amin nga ebidensia iti sanguanan ti impeachment court.
Kinarit ti abogado ti depensa a ti korte ti umno a forum tapno idatagda ti bukodna nga ebidensia a kas iti inkari dagitoy.
Innayonna a daytoy ti umno a panawen tapno sungbatan ni VP Sara ti amin nga alegasyon ken paneknekan ti kinainosente daytoy.
