Mangrugin ti Measles Rubella Supplementary Immunization Activity (MR SIA) inton Agosto 3 iti agdama a tawen kadagiti nagduduma nga health districts ken Health Services Office (HSO) ti siudad ti Baguio.
Inwaragawag daytoy ni Nurse Coordinator Sonia Wakat-Insas ita a bulan. Ti nasao a programa ket addaan iti tagline a “Chikiting Ligtas, Sa Bagong Pilipinas, Bawat Bata ay Ligtas mula Tigdas.”
Sigun keni Wakat-Insas, mangrugi inton Agosto, aglukat dagiti fixed vaccination sites, including health centers, health stations, private clinics, hospital outpatient departments (OPDs), ken dadduma pay a health facilities.
Maipatungpal met ti nasao a kampanya babaen iti koordinasyon dagiti nagduduma a health districts idiay Asin, Atab, Atok Trail, Aurora Hill, Campo Filipino, City Camp, Engineers Hill, Irisan, Loakan, Lucban, Mines View, Pacdal, Pinsao, Quezon Hill, Quirino Hill, ken Scout Barrio.
Dagiti ubbing nga agtawen iti 6 agingga 11 months ket maipaayan ti blue vitamin A capsule a naglaon iti 100,000 international units (IU) bayat a dagiti met agtawen iti 12 to 59 months ket maipaayan ti red capsule a naglaon iti 200,000 IU.
Puntirya ti Cordillera Administrative Region (CAR) a maipaay ti nasao a serbisyo iti pakabuklan a bilang dagiti ubbing a 150,816.
Impetteng met ti Department of Health-Cordillera ti kinapateg ti routine immunization coverage, school-entry immunization checks, ken School-Based Immunization (SBI) program tapno masalwadan ti salun-at dagiti maladaga ken ubbing. //bombokaren.c.sapirao
