Tinanggihan ng House prosecution panel ang paratang na “one-sided” sila sa impeachment trial ni Bise Presidente Sara Duterte, iginiit na nakabatay sa ebidensiya ang kanilang pag-uusig.
Ayon kay House prosecutor Terry Ridon, magkaiba ang pamantayang ginagamit sa mga testigo at sa mga senator-judges, kaya hindi maituturing na may kinikilingan ang prosecution. Aniya, ang pagkakaroon ng nakabinbing kaso ay maaaring makaapekto sa kredibilidad ng testigo ngunit hindi awtomatikong nagdidiskwalipika sa pagtestigo.
Binigyang-diin din ni Ridon na ang layunin ng prosecution ay panagutin ang sinumang opisyal batay sa matibay na ebidensiya sa Articles of Impeachment at hindi lamang ang manalo sa kaso.
Samantala, sinabi ni Deputy Minority Leader Arlene “Kaka” Bag-ao na ipinakikita ng impeachment proceedings ang mas mataas na antas ng pananagutan na inaasahan sa mga matataas na opisyal ng pamahalaan. Idinagdag naman ni House prosecution counsel Benjamin “Jay” Tolosa Jr. na kinikilala ng prosecution ang karapatan ng depensa sa masusing cross-examination bilang bahagi ng due process.
