Impetteng ni President Ferdinand Marcos, Jr. nga agnumar dagiti Pilipino iti maipapatakder a Pax Silica Industrial Hub idiay New Clark City, Tarlac a manamnama nga agserbi kas sentro ti artificial intelligence (AI) manufacturing ken logistics ti pagilian.
Iti maikalima nga State of the Nation Address (SONA) daytoy iti kalman, impannakelna ti agarup 1,600-ektarya nga industrial hub a manamnama a mangaramid iti maysa nga AI ecosystem a mangipaay iti panggedan, mangipapigsa iti industriya ti Pilipinas, ken mangpasayaat iti ekonomiya.
Nupay kasta, maipalagip a nakaawat ti proyekto iti pammabalaw gapu ta manamnama ti dakkel a konsumo daytoy iti kuryente ken water supply kas kangrunaan a kasapulan dagiti AI facilities.
Nainget a binabalaw daytoy ni ACT Teachers Party-list Representative Antonio Tinio no sadino impettengna nga imbes a mangitunda daytoy iti panagprogreso, posible nga agbalin pay kitdi daytoy nga estratehiya ti Amerika iti panangaramid kadagiti semi-conductors ken dadduma pay nga advances electronics a mabalin a maaramat iti military applications dagitoy. //bombokaren.c.sapirao
