Panggep ti National Bureau of Investigation (NBI) a maileppas iti uppat a lawas ti imbestigasionna iti anomalya ti 2019 Southeast Asian (SEA) Games.
Sigun kenni NBI Director Melvin Matibag, addan ti mapilaan iti kaso iti las-ud ti uppat a lawas.
Impeksa ti opisial a panggepda a leppasen ti imbestigasion iti uppat a lawas agsipudta addaan dagitoyen iti nalawag nga ebidensiya.
Immunan nga insubpoena ti NBI ti pito a sigud nga opisial ti Philippine Southeast Asian Games Organizing Committee (Phisgoc).
Karaman ditoy da PHISGOC Chairman Ramon “Tats” Suzara, Dexter Estacio- PHISGOC chief financial officer, ken ti corporate secretary a ni John Lester Buenconsejo.
Nupay kasta, abogado laeng dagiti sigud nga opisial ti PHISGOC ti nagparang iti NBI idi Lunes, July 27, 2026.
Maipalagip nga immunan nga imbaga ni Matibag a dumanon iti P6.7 billion a pondo ti gobierno ti naawat ti PHISGOC para iti 2019 SEA Games, partikular iti Philippine Sports Commission (PSC), Philippine Olympic Committee, ken Department of Budget and Management.
No karaman ti pondo nga inawat ti PHISGOC manipud iti pribado a sektor, mabalin a dumanon iti nasurok a P10 billion ti dagup a badyet ti komite.
Kabayatanna, mabalinda nga ipaulog ti subpoena kenni Senador Allan Peter Cayetano a nagserbi a chairman ti 2019 SEA Games no iraman daytoy dagiti sigud nga opisial ti PHISGOC.
